I LOVE YOU ! TUNAY NA KATAGA

Mahal nawa sa pagsikat ng araw sa umaga
Nais kong ibulong itong tatlong salita
Kailanman di sana maiwawaglit sa iyong gunita
Dahil "I LOVE YOU" ang tunay na kataga.

Salamat sa pagdating mo nang ako’y nangungulila
Dahil tuliro ang pag-iisip ko noon at balisa,
Tila sa paglutas ng mga suliranin walang magawa,
Datapwat nagagalak ako sa pagdating mong nakakabigla.

Kaya naman magmula nang ika’y makilala
Parang ang mundo ko’y nagbago at sumigla
Ang matamlay kong pakiramdam ngayo’y kaaya-aya,
Maging sa pagtratrabaho halos lahat aking inuunawa.

At sa paglubog ng araw,isang pasasalamat kay Dakilang Ama
Sa pagtugon Niya sa kahilingan na kakaiba
Sa walang kapantay at di mahihigitang pang-unawa
Pati na rin sa mga bagay at walang humpay na biyaya.

Sa Saliw Ng Aking Panulat

Sa saliw ng aking panulat mahal nais kitang pasalamatan
Sa pagbibigay ng kagalakan sa panahon ng kalungkutan
Sa pag-abot ng iyong mga kamay na di nag-aalinlangan
At nang ako’y naguguluhan ibinulong tamang kasagutan.

Sa saliw ng aking panulat mahal muli kong ilalarawan
Ang hirap at pasakit na tila bangungot sa isipan
Na kahit pinipilit kalimutan ay lagi akong binabalikan
Ng mga pangit na nakaraan na nais kong takasan.

Sa saliw ng aking panulat mahal tila ipinagkaloob ka ng kalangitan
Tugon sa mga gabing halos ang luha’y di mapigilan
Kasama huni ng mga kuliglig sa gabing puno ng kapanglawan
At ang kadiliman na bumabalot sa kapaligiran.

Sa saliw ng aking panulat mahal lagi sana nating tatandaan
Ang Diyos Ama na ang gumagawa ng mga pamamaraan
Upang tayo’y di magkahiwalay patungo sa kinabukasan
Pinapalakas bawat isa upang mga hadlang ay mapagtagumpayan